पालघर : पालघर लोकसभा मतदारसंघाचे खासदार डॉ. हेमंत सवरा यांनी महाराष्ट्र राज्याचे देवेंद्र फडणवीस यांच्याकडे एक महत्त्वपूर्ण निवेदन सादर केले असून त्यामध्ये विक्रमगड उपविभागाच्या अखत्यारित येणाऱ्या विक्रमगड शाखा कार्यालयाचे विभाजन करून नवीन ‘आलोंडे शाखा कार्यालय’ स्थापन करून त्यास मान्यता देण्याची मागणी केली आहे.
या भागात एकूण ३७,५२६ ग्राहक असून, सध्या फक्त १६ कर्मचाऱ्यांद्वारे ५७१ चौ. कि.मी. क्षेत्रात सेवा दिली जाते. त्यामुळे सेवा देताना अनेक अडचणी येत असून पावसाळ्यात याचा फटका अधिक जाणवतो. नवीन ‘आलोंडे शाखा कार्यालय’ स्थापन झाल्यास सेवा कार्यक्षमता वाढू शकेल ग्राहकांशी थेट संपर्क होईल आणि महसूलात देखील वाढ होऊ शकेल.
प्रस्तावित विभागणी :
विक्रमगड शाखा : ७,५९० ग्राहक, १४४ ट्रांसफार्मर
आलोंडे शाखा : ७,५०५ ग्राहक, १३८ ट्रांसफार्मर
याशिवाय, विक्रमगड तालुक्यातल्या आदिवासी बहुल भागां मधल्या गंभीर वीज समस्यांचे निवारण करण्यासाठी तातडीच्या उपाययोजना करण्याची मागणी देखील खासदार यांनी केली आहे. सध्या संपूर्ण तालुका एका उपकेंद्रावर अवलंबून असून अनेक वेळा जंगल, डोंगराळ भागांतून जाणाऱ्या 33 केव्ही लाईनमुळे वीज खंडित होण्याच प्रमाण वाढलं आहे.
खासदार डॉ. सवरा यांनी सुचवलेल्या उपाययोजना :
आलोंडे शाखा कार्यालय तत्काळ सुरु करणे आणि कर्मचाऱ्यांची नियुक्ती
पाचमाड-उपराळे-बांधण-माण या पट्ट्यात नवीन 33/22 केव्ही उपकेंद्र
मनोर येथे अतीउच्चदाब उपकेंद्र उभारणे आणि भोपोलीसह ग्रामीण ग्राहकांसाठी स्वतंत्र फीडर
विक्रमगड शहरासाठी स्वतंत्र गावठाण फीडर
जामसर (ता. जव्हार) येथील 132 केव्ही उपकेंद्र कार्यान्वित करणे
या मागण्यांची तात्काळ अंमलबजावणी झाल्यास विक्रमगड तालुक्यातल्या आदिवासी आणि ग्रामीण जनतेला मोठा दिलासा मिळेल. शिवाय शिक्षण, आरोग्य आणि शेतीच्या सुविधा अधिक सक्षम होऊ शकतील असं डॉ. हेमंत सवरा यांनी सांगितलं.
